គន្លឹះចំនួន ៦ ដើម្បីសិក្សាផ្នែកគណនេយ្យឲ្យមានប្រសិទ្ធភាព ដោយនិស្សិត ឯក វល័ក្ខ

ACCA គឺជាកម្មវិធីសិក្សា បង្រៀនជំនាញគណនេយ្យ (Accountant) ដែលបង្ហាត់ និងបង្រៀនឲ្យនិស្សិតបានយល់ដឹងច្បាស់លាស់ពីផ្នែកគណនេយ្យ។ ពិសេសទៅទៀតនោះ ACCA បានធ្វើឲ្យនិស្សិតមានឱកាសធ្វើការក្នុងតំណែងខ្ពស់ៗ សម្រាប់ក្រុមហ៊ុនធំៗផងដែរ។

ACCA គឺជាកម្មវិធីសិក្សាមួយដែលត្រូវបានទទួលស្គាល់នៅក្នុងប្រទេស ចំនួន ១៧០ ប្រទេសរួមមានទាំងកម្ពុជាផងដែរ។

និស្សិតកម្ពុជាកញ្ញា ឯក វល័ក្ខប្រឡងបានពិន្ទុ ៩៣ លើពិន្ទុសរុប ១០០ នៃការប្រឡងមុខវិជ្ជា F7 (Financial Reporting) នៃការសិក្សាវគ្គ ACCA រូបនេះ បាន ណែនាំពីវិធីសាស្ត្រ និងទម្លាប់ល្អមួយចំនួនដែលធ្វើឲ្យនាងអាចទទួលបានពិន្ទុល្អជាងគេ នេះថា៖

ចំណុចទី ១ គឺ អានមេរៀនទុកមុន។ ការអានអាចជួយឲ្យយើងមានគំនិតច្រើន ជាពិសេសបង្កើតជាចម្ងល់ ដែលអាចជួយឲ្យយើងមានសំណួរ ឬយល់បានក្នុងពេលគ្រូបង្រៀន។

ចំណុចទី ២ គឺរៀនដោយខ្លួនឯង។ ការរៀនខ្លួនឯង គឺទាក់ទងនឹងការអនុវត្តលំហាត់ក្រោយចប់ម៉ោងរៀន។ លំហាត់នោះអាចយកពីជាសៀវភៅលំហាត់ ឬជា Past Paper។ Past Paper គឺជាកម្រងសំណួរ និងលំហាត់ទាក់ទងនឹងការប្រឡង ACCA កន្លងមក។ សិស្សអាចចូលទៅមើល Examiner Comment ដែលជាមតិយោបល់របស់អ្នកកំណែលំហាត់ដែលមាននៅទំព័រក្រោយនៃសៀវភៅ លំហាត់ ដែលនិយាយបកស្រាយពីលំហាត់នីមួយៗ និងបកស្រាយពីកំហុសក្នុងការប្រឡងដែលសិស្សអាចជួបប្រទះក្នុងពេល ប្រឡងកន្លងមក។
ចំណុចនេះ វល័ក្ខបានប្រាប់ថា៖ «នៅពេលយើងធ្វើលំហាត់ហើយ យើងត្រឡប់ទៅមើលចម្លើយដែលយើងបានធ្វើ ថាតើវាត្រឹមត្រូវ ឬខុសត្រង់ណា ហើយមើលការបកស្រាយរបស់ Examiner ដូច្នេះយើងនឹងយល់កាន់តែច្រើន»។

ចំណុចទី ៣ គឺ ការតាមដានមេរៀន (Follow up)។ នេះមានន័យថា នៅពេលដែលយើងរៀនមេរៀនមួយ គឺត្រូវចេះមេរៀននឹងឲ្យស្ទាត់។ ធ្វើយ៉ាងណាត្រូវប្រាកដខ្លួនឯងថាត្រូវតែចេះមេរៀននៅថ្ងៃហ្នឹង និងមានសមត្ថភាពធ្វើលំហាត់ឲ្យចេះ និងស្ទាត់។ វល័ក្ខ បាននិយាយថា៖ «បើសិនជាយើងមិនបានទៅរៀន(Missed class) យើងក៏ត្រូវឲ្យចេះមេរៀនហ្នឹងដែរ»។
និស្សិតរូបនេះបន្តទៀតថា ការកំណត់ខ្លួនឯងបែបនេះគឺជាជំហានល្អក្នុងការតាមដាន នៅពេលលោកគ្រូអ្នកគ្រូណែនាំមេរៀនថ្មីនៅក្នុងថ្នាក់។

ចំណុចទី ៤ គឺ ព្យាយាមដាក់សំណួរឲ្យខ្លួនឯង (Keep Asking ourselves questions)។ ចំណុចនេះទាក់ទងនឹងពេលកំពុងរៀន គឺនៅពេលដែលលោកគ្រូ ឬអ្នកគ្រូបង្រៀនពីមេរៀនថ្មីមក យើងត្រូវចាប់ផ្តើម ដាក់សំណួរភ្លាមថា៖ «តើអីទៅជាដើមហេតុនៃការបង្កើតមេរៀននេះឡើង? ដូចច្នេះយើងត្រូវគិត ហើយបង្កើតការគិតទុកមុន (Expectation) ដែលជាមូលហេតុដែលយើងបានគិតដោយខ្លួនឯង។ បន្ទាប់មកចាំស្តាប់ការពន្យល់របស់គ្រូ ថាតើការពន្យល់របស់គាត់ត្រូវហ្នឹងអ្វីដែលយើងបានគិតឬអត់? បើសិនជាមិនត្រូវទេ យើងត្រូវត្រឡប់មកពិនិត្យមើល (Expectation) របស់យើងម្តងទៀត ដើម្បីរកចំណុចខ្វះខាត»។

ចំណុចទី ៥ គឺ សិក្សាពីចំណេះដឹងទូទៅ។ ចំណេះដឹងទូទៅនៅទីនេះ សំដៅទៅលើចំណេះដឹងផ្នែកគណនេយ្យ និងអត្ថបទផ្សេងៗទាក់ទងផ្នែកនេះ។ វល័ក្ខ បានណែនាំឲ្យចូលទៅវេបសាយរបស់សាលា CamEd ឬ ACCA's website ដើម្បីចុចមើលអត្ថបទបច្ចេកទេស (Technical Article)។ Technical Article គឺជា កន្លែងដែលសិស្សនិស្សិតអាចចូលទៅមើល ឬអានពីអត្ថបទផ្សេងៗ ដែលមានការពន្យល់បកស្រាយជាក់ច្បាស់ ទៅលើផ្នែកណាមួយដែលយើងបានដឹង និងចង់ចេះ។

រីឯ ចំណុចចុងក្រោយ គឺការដាក់ គោលដៅឲ្យខ្ពស់ឲ្យខ្លួនឯង។ ជាឧទាហរណ៍ វល័ក្ខបាននិយាយថា៖ «បើសិនជាពិន្ទុស្តង់ដារ ត្រឹម ១០០ យើងត្រូវកំណត់គោលដៅឲ្យលើសទៅដល់ ១២០ ព្រោះថានៅពេលដែលយើងកំណត់បែបនេះ យើងនឹងព្យាយាមខំ ធ្វើឲ្យបាន បើសំណាងល្អ យើងអាចធ្វើបាន ៩០ ឬជិត ១០០ ពិន្ទុ»។ ទន្ទឹមនឹងការដាក់គោលដៅខ្ពស់ គឺត្រូវតែមើលលើការខំប្រឹងរបស់យើងដែរ។

សរុបមក ACCA មានវគ្គសិក្សាចំនួន ១៤ មុខ ដែលមានវគ្គ Foundation [ឬហៅថា វគ្គសិក្សាជំនាញ (Skill Level)] ចំនួន ៩ វគ្គ គួបផ្សំនឹងវគ្គ Professional Level ចំនួន ៥ វគ្គទៀត។ ចំណែកក្នុង ១ វគ្គ គឺមានរយៈពេល ៦ ខែ៕

គន្លឹះ​​ចំនួន​ ៦ ដើម្បី​សិក្សា​ផ្នែក​​គណនេយ្យ​ឲ្យ​មាន​ប្រសិទ្ធភាព ដោយនិស្សិត ឯក វល័ក្ខ

គន្លឹះចំនួន ៦ ដើម្បីសិក្សាផ្នែកគណនេយ្យឲ្យមានប្រសិទ្ធភាព ដោយនិស្សិត ឯក វល័ក្ខ